مغربی بنگال میں طب یونانی کی صورت حال‘ پر کولکاتا میں ریاستی کنونشن 10 ستمبر کو

کولکاتا۔ 7 ستمبر 2023

آل انڈیا یونانی طبّی کانگریس مغربی بنگال یونٹ کے زیراہتمام کولکاتا میں 10 ستمبر 2023 کو ’طب یونانی کی صورت حال‘ پر ریاستی کنونشن کا انعقاد کیا گیا ہے۔ آل انڈیا یونانی طبّی کانگریس مغربی بنگال یونٹ کے صدر ڈاکٹر نظام الدین اور جنرل سکریٹری حکیم منظر صادق نے مشترکہ طور پر جاری بیان میں بتایا کہ مغربی بنگال میں طب یونانی مجموعی طور پر ناگفتہ بہ صورت حال کا سامنا کر رہی ہے۔ دو دہائی سے زیادہ وقفہ سے یہاں یونانی میڈیکل آفیسرز کی تقرری نہیں ہوئی ہے اور کُل تین شفاخانوں میں صرف ایک میڈیکل آفیسر مقرر ہے۔ اُن کے ریٹائرمنٹ کے بعد یہاں بھی آسام اور گجرات جیسی صورت حال پیدا ہوجائے گی۔ انہوں نے یہ بھی تبایا کہ کولکاتا میں ایک ہی پرائیویٹ یونانی میڈیکل کالج ہے اس کی صورت حال بھی اچھی نہیں ہے۔ ڈاکٹر منظر صادق نے مزید کہا کہ ہم یہاں کے عوامی نمائندوں سے رابطہ میں ہیں اور کئی ذمہ دار شخصیات مذکورہ کنونشن میں شامل ہو رہی ہیں۔ امید ہے کہ یہ کنونشن بامقصد ہوگا اور طب یونانی کی ترویج و ترقی کے لیے راہیں ہموار ہوں گی۔ کنونشن میں دہلی سے آل انڈیا یونانی طبّی کانگریس کے سکریٹری جنرل ڈاکٹر سیّد احمد خاں اور چنئی سے آل انڈیا یونانی طبّی کانگریس کے انٹرنیشنل کوآرڈی نیٹر ڈاکٹر عبیداللہ بیگ بھی شرکت کریں گے۔