اب یہ من مرضی نہیں، جن مرضی چلے گی: اکھلیش یادو

نئی دہلی، 02 جولائی (ہ س)۔ سماج وادی پارٹی کے سربراہ اکھلیش یادو نے منگل کے روز لوک سبھا میں مختلف مسائل پر حکومت کو گھیرنے کی کوشش کی۔ انہوں نے کہا کہ اس بار کے انتخابات نے فرقہ پرستی کی سیاست کو مکمل طور پر مسترد کر ہے۔ اب عوام نے بتا دیا ہے کہ من مرضی نہیں بلکہ جن مرضی چلے گی۔
لوک سبھا میں صدر جمہوریہ کے خطاب پر شکریہ کی تحریک پر بحث میں حصہ لیتے ہوئے اپوزیشن کی جانب سے اکھلیش یادو نے کہا کہ اتحاد کی حکومت آنے پر اگنیور یوجنا کو ہٹا دیا جائے گا۔ اس دوران انہوں نے پیپر لیک کا مسئلہ اٹھایا اور ترقی کے دعوؤں کو کھوکھلا قرار دیا۔ انہوں نے کہا کہ مرکزی حکومت نے اتر پردیش کے ساتھ امتیازی سلوک کیا ہے۔