وزیر اعظم مود ی برکس سربراہی اجلاس کے لیے روس کا دورہ کریں گے

 نئی دلی۔ 18؍ اکتوبر۔ ایم این این۔ وزیر اعظم نریندر مودی کازان میں منعقد ہونے والی 16ویں برکس (برازیل، روس، ہندوستان، چین اور جنوبی افریقہ) چوٹی کانفرنس میں شرکت کے لیے روسی صدر ولادیمیر پوتن کی دعوت پر 22 سے 23 اکتوبر تک روس کا دورہ کریں گے۔ وزارت خارجہ  نے جمعہ کو یہاں دورے کا اعلان کرتے ہوئے کہا کہ سربراہی اجلاس، جس کا موضوع ہے "صرف عالمی ترقی اور سلامتی کے لیے کثیرالجہتی کو مضبوط بنانا”، رہنماؤں کو اہم عالمی مسائل پر تبادلہ خیال کرنے کے لیے ایک اہم پلیٹ فارم فراہم کرے گا۔ برکس کی جانب سے شروع کیے گئے اقدامات کی پیشرفت کا جائزہ لینے اور مستقبل میں تعاون کے لیے ممکنہ شعبوں کی نشاندہی کرنے کا قیمتی موقع ہے۔  وزارت خارجہ امور نے مزید کہا کہ اپنے دورے کے دوران، وزیر اعظم سے برکس کے رکن ممالک کے اپنے ہم منصبوں اور قازان میں مدعو رہنماؤں کے ساتھ دو طرفہ ملاقاتیں بھی متوقع ہیں۔ تاہم یہ واضح نہیں ہے کہ آیا مسٹر مودی چینی صدر شی جن پنگ کے ساتھ بھی دو طرفہ بات چیت کریں گے جو اس سربراہی اجلاس میں چینی وفد کی قیادت کریں گے۔یہ مسٹر مودی کا اس سال روس کا دوسرا دورہ ہوگا۔ وہ جولائی میں صدر پوتن کے ساتھ 22ویں ہندوستان۔روس سربراہی اجلاس کے لیے ماسکو گئے تھے۔