سرفرازاحمدقاسمی حیدرآباد
رابطہ: 8099695186
اسرائیل نے گزشتہ 13 جون جمعہ کی رات ایران پر حملہ کردیا جس کا اعلانیہ مقصد واشنگٹن اور تہران کے درمیان تعطل کا شکار نیوکلیائی مذاکرات کے دوران ایران کی تیز رفتار نیوکلیائی پیشرفت کو روکنا تھا،ایران نے بھی بھرپور جوابی حملہ کیا،لڑائی کے تازہ ترین دور میں دونوں فریقوں کو کافی جانی و مالی نقصان ہوا ہے،اسرائیل اور امریکہ کے ساتھ ایران کی دشمنی وقت کے ساتھ ساتھ مزید گہری ہوتی جارہی ہے اور ایران اسرائیل کی جاریہ جنگ دراصل خطے میں طاقت کے توازن کی جنگ ہے،اس جنگ کا اختتام کہاں جاکر ہوگا؟علاقے میں اسکے اثرات کیا ہونگے؟ابھی یہ سب کچھ صاف نہیں ہے،آنے والے وقت میں یہ دیکھنا ہوگا کہ یہ جنگ یہیں ختم ہوجاتی ہے یا پھر امریکہ کی براہ راست شمولیت کے ساتھ اس میں مزید شدت پیدا ہوتی ہے،جنگ تو بہر حال جنگ ہے،اسرائیلی میڈیا نے انکشاف کیا ہے کہ اسرائیل کا یومیہ
میزائل دفاعی نظام تقریباً 250 ملین ڈالر لاگت کا حامل ہے۔ذرائع کے مطابق اسرائیل کے میزائل دفاعی نظام پر ہونے والے اخراجات حیران کن حد تک زیادہ ہیں۔یومیہ 250 ملین ڈالر کی یہ لاگت اسرائیل کے لئے نہ صرف ایک مالی چیلنج ہے بلکہ اس سے ظاہر ہوتا ہے کہ موجودہ خطے کی صورتحال کس قدر سنگین اور مہنگی ہو چکی ہے۔اگر یہ کشیدگی جاری رہی تو دفاعی اخراجات،اسرائیل کی معیشت پر گہرے اثرات ڈال سکتے ہیں۔اسرائیل کو ایک ایرانی میزائل انٹر سیپٹ کرنے( فضاء میں ناکارہ بنانے ) پر 30 ہزار ڈالر سے 7 لاکھ ڈالر تک کا مالی نقصان ہوتاہے۔
خبروں کے مطابق ایران نے جنگ بندی کے لئے عرب ممالک سے رابطے بھی کئے ہیں،ایران کی جانب سے جنگ بندی کے لیے تین خلیجی ممالک کا تعاون لینے کا دعویٰ سامنے آگیا ہے۔روئٹرز کے مطابق ایران نے سعودی عرب،سلطنت عمان اور قطر سے درخواست کی ہے کہ وہ امریکی صدر ڈونلڈ ٹرمپ کے ساتھ اپنے تعلقات کا استعمال کرتے ہوئے اسرائیل پر جنگ بندی کے لئے دباؤ ڈلوائیں سمجھا جاتا ہے کہ اسی پس منظر میں
اسرائیلی جارحیت کے خلاف جہاں ایک طرف دنیا بھر میں آوازیں بلند ہورہی ہیں تو وہیں دوسری جانب مسلم ممالک نے بھی صیہونی شرانگیزی کے خلاف اتحاد کا زبردست مظاہرہ کرتے ہوئے ایک مشترکہ اعلامیہ جاری کیا ہے،سعودی عرب سمیت 21 عرب اور مسلم ممالک نے اسرائیل کی جانب سے ایران پر حملوں کی شدید مذمت کرتے ہوئے اسے یکسر مسترد کر دیا اور اس کشیدہ صورت حال پر گہری تشویش کا اظہار کیا ہے،جو خطے کے امن و استحکام کے لئے سنگین خطرہ بنتی جا رہی ہے،مصری وزارت خارجہ کی جانب سے جاری کئے گئے مشترکہ پریس اعلامیہ میں ان ممالک کے وزرائے خارجہ نے مطالبہ کیا ہے کہ کشیدگی کو فی الفور کم کیا جائے،تاکہ جنگ بندی اورمکمل امن کی فضا قائم کی جا سکے،بیان پر دستخط کرنے والے ممالک میں سعودی عرب،مصر،اردن،متحدہ عرب امارات، پاکستان،بحرین،برونائی،چاڈ،
مسلم ممالک کے اس بیان سے ایک دن پہلے ایرانی صدر ڈاکٹر مسعود پزشکیان نے اپنے بیان میں کہا تھا کہ دشمن کسی غلط فہمی میں نہ رہے،ایران نیوکلیئر ٹیکنالوجی کے حق سے دستبردار نہیں ہوگا،اسلامی جمہوریہ ایران کے صدر ڈاکٹر مسعود پزشکیان نے پارلیمنٹ کے اجلاس میں وزیر برائے اقتصادی امور کو رائے اعتماد دینے کے موقع پر اپنے خطاب کے دوران حالیہ شہادتوں پر تعزیت پیش کرتے ہوئے کہا کہ ہماری تمنا ہے کہ ہماری زندگی کا اختتام شہادت پر ہو،یہ ایک عقیدہ اور فکری اثاثہ ہے،جو ہمیں دین اور ائمہ علیہم السلام سے ورثے میں ملا ہے،ہم سمجھتے ہیں کہ شہادت بستر پر مرنے سے بہتر ہے،انہوں نے کہا کہ دشمن اسرائیلی قوم کو شہید کرکے میدان سے نہیں نکال سکتا، اگر کوئی ہیرو شہید ہوتا ہے تو سیکڑوں دوسرے اس کا پرچم اٹھا لیتے ہیں اور ظلم و بربریت کے سامنے کھڑے ہو جاتے ہیں،انہوں نے کہا کہ ہم نے حملہ شروع نہیں کیا بلکہ صرف اپنے دفاع میں کھڑے ہیں ہم نے نہ تو کمانڈروں کو قتل کیا نہ سائنسدانوں کو، دشمن دنیا کے دوسرے کنارے سے آتا ہے ایک سائنس داں اور اس کے خاندان کو مار دیتا ہے،یہ کہاں انصاف ہے؟ ایرانی سائنسدانوں کے ہاتھ میں بندوق نہیں بلکہ علم ہوتا ہے یہ سائنسداں ہی ہیں جنہوں نے ملکی دفاع کو ممکن بنایا ہے اور یہی وجہ ہے کہ دشمن انہیں نشانہ بناتا ہے،آج ملت کو اتحاد،رحم دلی اور یکجہتی کی شدید ضرورت ہے،تمام اختلافات اور شکوے چھوڑ کر ہمیں متحد ہو کر دشمن کے مقابل کھڑا ہونا ہوگا،انہوں نے واضح کیا کہ ہم ایٹمی ہتھیار بنانا نہیں چاہتے یہ ہمارے عقیدے اور رہبر معظم کی ہدایت کے مطابق ہے کہ ہم ایٹمی ہتھیار نہیں چاہتے،اگر کوئی شخص اس پالیسی کے خلاف بات کرے تو اس کی کوئی حیثیت نہیں ہے،البتہ ہمارا حق ہے کہ پر امن نیوکلیائی توانائی اور تحقیق سے فائدہ اٹھائیں،یہ حق ہمیں بین الاقوامی قوانین کے تحت حاصل ہے اور کوئی طاقت ہمیں اس سے محروم نہیں کر سکتی صدر مسعود نے کہا کہ آج اسلامی ممالک کو متحد ہونا چاہیے،ہم نے ہمیشہ اسلامی ممالک کے ساتھ برادری کا ہاتھ بڑھایا ہے مگر اسرائیل ایک ایک کر کے مسلمانوں کو نشانہ بنا رہا ہے تاکہ اپنی فاسد نیت کو ہم پر مسلط کریں، جیسا کہ کل پاکستان کی سینٹ نے اسرائیل کی گھناؤنی پالیسیوں کے خلاف ایران کی حمایت میں قرارداد منظور کی،اسی طرح دیگر ممالک کو بھی کھل کر ہمارا ساتھ دینا ہوگا،اس دوران ایرانی پارلیمنٹ کے سربراہ محمد باقر قالیباف نے کہا ہے کہ ایران اسرائیل کو صیہونی وحشیوں کے لیے جہنم بنا دے گا،ایرانی پارلیمنٹ کے اسپیکر محمد باقر قالیباف نے پارلیمنٹ کے اجلاس سے خطاب کرتے ہوئے اسرائیل کو خبردار کیا کہ ایران کے مسلح افواج اپنے وحشی دشمن کو مکمل طور پر بے بس کر دیں گی،قالیباف نے مزید کہا کہ صیہونیوں کی راتوں کی نیندیں حرام ہو چکی ہیں،ایرانی فوج،دشمن کو جہنم کا مزہ چکھائیں گی اور دنیا اس کی ذلت و رسوائی کا مشاہدہ کرے گی،اسپیکر قالیباف نے زور دے کر کہا کہ ہم غیر معمولی صورتحال سے گزر رہے ہیں اور ہمارا درندہ صفت دشمن کسی حدود و قانون کو نہیں مانتا، اگرچہ ہماری حتمی فتح یقینی ہے مگر اس راہ میں نشیب و فراز آئیں گے،قالیباف نے ایرانی قوم کی وحدت کی تعریف کرتے ہوئے کہا کہ مختلف قومیتی اور فکری پس منظر رکھنے والے افراد نے متحد ہو کر مسلح افواج کی پشت پر کھڑے ہو کر دشمن کو ایک واضح پیغام دیا ہے،اسرائیلی حکومت کے دھمکی آمیز اقدامات نے ایرانی قوم کے اندر مزید اتحاد و استقامت کو فروغ دیا ہے،ایرانی پارلیمنٹ کے اسپیکر نے سپاہ پاسداران انقلاب اسلامی اور ایرانی فوج کے عسکری طاقت کی بھی ستائش کی اور رہبر انقلاب اسلامی آیت اللہ سید علی خامنئی کی قیادت کو اس کامیابی کا محور قرار دیا،قالیباف کے مطابق دشمن اس وقت ایک ہائبرڈ وار میں مصروف ہے مگر ایران نے ان تمام چالوں کا مؤثر جواب دیا ہے،ایران کے ایک اعلی عہد ے دار نے اسرائیل کے خلاف جنگ کے لئے اسلامی فوج کی تشکیل کا مطالبہ بھی کیا ہے،ایرانی رہنما محسن رضائی نے ترکی سعودی عرب پاکستان اور دیگر کئی ممالک سے مطالبہ کیا کہ وہ مشرق وسطی میں ایک متحدہ مخالف اسرائیلی اتحاد تشکیل دیں جو مشرق وسطی کا تحفظ کر سکیں۔ایران کے سپریم لیڈر آیت اللہ علی خامنئی نے بھی اپنے ایک حالیہ بیان میں کہا ہے کہ ہم نے خود کو شیعہ سنی عرب عجم جیسے فرقوں میں بانٹ لیا ہے،اس تفرقے نے ہمیں کمزور کیا ہے، امت کی طاقت اتحاد میں ہے اختلاف میں نہیں، اس لئے ہمیں متحد ہو کر دشمنوں کا مقابلہ کرنا ہوگا۔سوال یہ ہے کہ کیا ایران کی اس اپیل پر لبیک کہاجائے گا؟کیا مسلم ممالک ایران کے اس مطالبے کو تسلیم کرکے اسے عملی جامہ پہنائیں گے؟کیا نیٹو افواج کی طرز پر مسلم ممالک اپنے دفاع اور تحفظ کے لئے اسلامی فوج کی تشکیل کریں گے؟ ایران نے آج پہلی بار اسلامی فوج کی تشکیل کا مطالبہ نہیں کیا ہے،بلکہ یہ آواز کا فی پہلے سے اٹھائی جارہی ہے اور مختلف ممالک پر مشتمل اسلامی فوج کی تشکیل کا مطالبہ کیاجاتارہاہے لیکن اب تک یہ آواز صدا بہ صحرا ہی ثابت ہوا،مشرق وسطی کے مسلم ممالک متحدہ پلان پر آگے اس پر سنجیدگی سے غور کرتے ہیں یا نہیں اس پر کچھ کہنا قبل از وقت ہوگا کیونکہ شیعہ،سنی کی دو دو اینٹوں کی مسجد و امام بارگاہ بناکر امت کو تقسیم کرنے کا جو منصوبہ 1979ء سے شروع ہوا تھا اس نے مشرق وسطی کو صہیونی عفریت کی ہتھیلی میں رکھ کر ہی دم لیا۔
ایرانی سپریم لیڈر سید علی خامنائی کہتے ہیں کہ ہماری شناخت ایک امت کی ہونی چاہیے۔شیعہ سنی کی نہیں۔کاش !!!
یہ الفاظ ان مذہبی پیشواؤں کی زبانوں پر 2003ء میں عراق پر امریکی حملے اور2011ء میں شامی تحریک کے وقت بھی آتے تو آج یہ سیناریو نہ ہوتا۔ہم آج کہیں بھی اسرائیل کی جانب سے ایران پر ہورہے حملوں پر افسوس کا اظہار کرتے ہیں اوراسکی مذمت کرتے ہیں تو عراق،شام،یمن اور لبنان کے سنی مسلمان اپنے ممالک کے کھنڈرات کی دلخراش تصاویر شئیر کرکے ایران کے کردار پر ہم سے سوال کرتے ہیں۔جس کا ہمارے پاس کوئی جواب نہیں ہے۔ اگر امت کے مجموعی عقیدے کا احترام اور انکے رموز و مسلمات کی تقدیس کو ملحوظ رکھا جاتا۔فرقہ پرست ملیشیا گروپوں پر ایرانی پیسہ خرچ نہ ہوتا اور کف اڑاتے معممین کو گستاخیوں پر پیسے اور گاڑیاں گفٹ نہ کی جاتیں تو آج حالات یقینی طورپر بہت مختلف ہوتے۔حالیہ منظر اس حقیقت کی زندہ تصویر ہے جسے رب العالمین نے کھینچتے ہوئے فرمایا ہے ” ولاتنازعوا فتفشلوا وتذهب ريحكم”
آج اختلاف اور تنازع اپنی انتہاؤں کو چھوکرہمارے اوپر سے گزرچکا ہے اور اب ہم فشل اور خروج ریح کے مرحلے سے دوچار ہیں۔ ایسے میں پھر بھی ہمیں ماضی کی تلخ یادوں کو بھلاکر متحد ہونے کی ضرورت ہے،یہ وقت کا اہم تقاضہ بھی ہے۔
ایران اسرائیل کے درمیان حالیہ تصادم دراصل مغرب اور مشرق کی اس کشمکش کا حصہ ہے جس میں مسلم ممالک صرف تماشائی ہیں،اس تناظر میں صرف مذمتی بیان جاری کرنا ہرگز کا فی نہیں ہے، مسلم ممالک کے سربراہان اور قائدین کو متحد ہوکر ایک مشترکہ موقف قائم کرنا ہوگا،اگر مسلم ممالک اپنے دفاعی اقدام اور منظم منصوبہ منصوبہ بندی میں ناکام رہتے ہیں تو اسکے نتائج انتہائی خوفناک ہونگے اور بیت المقدس سے لیکر تہران اور بغداد سے لیکر بیروت تک سارے مسلم شہر تباہ ہوتے رہیں گے،ایک ایک کرکے سب کی باری آئے گی،سامراجی طاقتوں اور انکی تعصب پر مبنی پالیسیوں سے کوئی نہیں بچے گا۔
اب وقت آچکا ہے کہ مسلم ممالک اپنی خود داری کا مظاہرہ کریں امریکہ اور اسرائیل کے دباؤ سے باہر نکل کر اپنی پالیسیوں کا تعین کریں اور ایک مضبوط مشترکہ اسلامی بلاک کی تشکیل کی طرف قدم بڑھائیں عرب قیادت کو قران و سنت کی روشنی میں اپنے طرز عمل پر نظر ثانی کرنی چاہیے،انہیں سمجھنا ہوگا کہ امت کی تباہی میں خاموشی بھی جرم ہے اور دشمنوں کی حمایت کھلی غداری ہے اگر آج وہ دنیا کی چند دن کی عیش و عشرت کے لئے مظلوم مسلمانوں کے خون پر سودا کریں گے تو کل نہ صرف تاریخ انہیں معاف نہیں کرے گی بلکہ اللہ کا عذاب بھی ان کے سروں پر نازل ہوگا یہ وقت ہے کہ وہ قران کا مطالعہ کریں ایمان کی روشنی کو دوبارہ دریافت کریں اور امت کے شانہ بشانہ کھڑے ہو کر ظلم کے خلاف آواز بلند کریں،ایران کو بھی اپنی گزشتہ غلطیوں کو سنوارنا ہوگا اور مذہبی شدت پسندی جس کے لئےانہوں نے مختلف مسلم ملکوں میں سنی مسلمانوں کا قتل کرایا،شیعت کے فروغ کےلئے بے دریغ پیسے اور طاقت کا استعمال کیا، خود ایران میں سنی مسلمانوں کےلئے زمینں تنگ کی ان چیزوں سے اسے باز رہنا ہوگا،اور آئندہ اس طرح کی تمام تر سرگرمیوں پر ایران کو روک لگانا ہوگا تب جاکر کوئی مستحکم اتحاد ممکن ہے، کیا ایران اسکےلئے تیار ہے؟ تاکہ مسلم ممالک انکے مطالبہ کو عملی جامہ پہناسکیں۔ ورنہ بہ قول شاعر
درد کی حد سے گزارے تو سبھی جائیں گے
جلد یا دیر سے مارے تو سبھی جائیں گے
چاہے کتنی بھی بلندی پہ چلا جائے کوئی
آسمانوں سے اتارے تو سبھی جائیں گے
*(مضمون نگار،معروف صحافی اور کل ہند معاشرہ بچاؤ تحریک کے جنرل سکریٹری ہیں)*