بات چیت کا بیشتر حصہ بھارت میں قطری سرمایہ کاری میں اضافے کے مواقع پر مرتکز تھا، ان شعبوں میں خصوصاً بنیادی ڈھانچہ، جدید مینوفیکچرنگ، نقل و حمل، لاجسٹکس، خوراک ڈبہ بندی، صحت، سیمی کنڈکٹرس اور مالیات جیسے شعبے شامل تھے
اقتصادی امور کے محکمے (ڈی ای اے)، وزارت خزانہ، حکومت ہند کے ذریعہ آج نئی دہلی میں قطر کے ایک وفد کے ساتھ متعلقہ فریقوں کی ایک اعلیٰ سطحی میٹنگ منعقد کی گئی جس کا مقصد دونوں ممالک کے مابین باہمی سرمایہ کاری تعاون کو مضبوطی فراہم کرنا تھا۔
اس میٹنگ کی مشترکہ صدارت خزانہ کے مرکزی وزیر مملکت جناب پنکج چودھری اور قطر کے غیر ملکی تجارتی امور کے وزیر مملکت عزت مآب ڈاکٹر احمد بن محمد ال سعید نے کی۔
میٹنگ میں تبادلہ خیال کا بیشتر حصہ بھارت میں خصوصاً بنیادی ڈھانچہ، جدید مینوفیکچرنگ، نقل و حمل، لاجسٹکس، خوراک ڈبہ بندی، صحت، سیمی کنڈکٹرس او رمالیات جیسے شعبوں میں قطری سرمایہ کاری کو بڑھانے کے مواقع پر مرتکز تھا۔
طرفین نے قطر کے 10 بلین ڈالر کی سرمایہ کاری کرنے اور ہندوستان میں کیو آئی اے کا دفتر کھولنے کے عزم کو یاد کیا جو فروری 2025 میں قطر کے امیر کے سرکاری دورۂ ہند کے دوران کیا گیا تھا۔ اس تناظر میں، انہوں نے اہم شعبوں اور مخصوص منصوبوں اور کمپنیوں پر توجہ مرکوز کرتے ہوئے کیو آئی اے اور دیگر قطری اداروں کے ذریعہ سرمایہ کاری کے لئے بات چیت کو مزید فروغ دینے کا فیصلہ کیا۔ قطری فریق نے بتایا کہ وہ ہندوستان کی اقتصادی ترقی اور تکنیکی ترقی کو دیکھتے ہوئے ہندوستان میں سرمایہ کاری کے مختلف مواقع دیکھ رہے ہیں۔
کیو آئی اے نے ہندوستان میں متعدد شعبوں میں سرمایہ کاری کی ہے جیسے خوردہ، افادیت، میڈیا، ہاؤسنگ، حفظانِ صحت اور رئیلٹی۔ قطر میں ہندوستانی کمیونٹی نے بھی قطر میں خاص طور پر ایس ایم ای سیکٹر میں سرمایہ کاری کی ہے ۔ قطر کے اعلیٰ سطحی وفد کا دورہ ہندوستان میں دستیاب مواقع کے بارے میں گہرائی سے سمجھنے میں مدد فراہم کرے گا اور دونوں فریقوں کے درمیان سرمایہ کاری کی شراکت کو مضبوط بنانے میں تعاون کرے گا۔