ہند۔عمان سیپا معاہدے کے نفاذ سے دوطرفہ تجارت میں نمایاں اضافے کی توقع

مسقط؍ نئی دہلی۔3؍ جون۔ ایم این این۔ بھارت اور عمان کے درمیان جامع اقتصادی شراکت داری معاہدہ (CEPA) یکم جون 2026 سے نافذ ہو گیا ہے، جس کے بعد دونوں ممالک کے درمیان تجارت، سرمایہ کاری اور اقتصادی تعاون میں نمایاں اضافے کی توقع ظاہر کی جا رہی ہے۔ ماہرین کے مطابق یہ معاہدہ نہ صرف تجارتی حجم میں اضافہ کرے گا بلکہ خلیجی خطے میں بھارت کی اقتصادی موجودگی کو بھی مزید مضبوط بنائے گا۔  معاہدے کے تحت بھارت کو عمان کی 98.08 فیصد ٹیرف لائنز پر مکمل ڈیوٹی فری رسائی حاصل ہوگی، جو عمان کو ہونے والی بھارتی برآمدات کی تقریباً 99.38 فیصد مالیت کا احاطہ کرتی ہے۔ اس اقدام سے بھارتی مصنوعات عمانی منڈی میں مزید مسابقتی ہو جائیں گی۔  حکام کے مطابق ٹیکسٹائل، چمڑا، پلاسٹک، انجینئرنگ مصنوعات، زرعی اشیا، سمندری خوراک، فارماسیوٹیکل مصنوعات، جواہرات اور زیورات سمیت متعدد شعبے اس معاہدے سے براہِ راست فائدہ اٹھائیں گے۔ عمانی منڈی تک آسان رسائی سے بھارتی برآمدات میں خاطر خواہ اضافہ متوقع ہے۔  اقتصادی ماہرین کا کہنا ہے کہ عمان بھارت کے لیے صرف ایک تجارتی شراکت دار ہی نہیں بلکہ ایک اہم اسٹریٹجک مرکز بھی ہے۔ عمان کی بندرگاہیں، خصوصاً دقم اور صلالہ، خلیج، افریقہ اور یورپ تک رسائی کے لیے اہم تجارتی راہداریوں کا کردار ادا کرتی ہیں۔  بھارت اور عمان کے درمیان دوطرفہ تجارت مالی سال 2025-26 میں تقریباً 11.18 ارب ڈالر تک پہنچ چکی ہے، اور دونوں ممالک کو امید ہے کہ سیپا معاہدے کے نفاذ سے یہ حجم آنے والے برسوں میں مزید تیزی سے بڑھے گا۔  تجزیہ کاروں کے مطابق یہ معاہدہ توانائی کے شعبے میں بھی اہم ثابت ہو سکتا ہے۔ عمان پہلے ہی بھارت کے لیے تیل، گیس، پیٹروکیمیکلز اور کھادوں کا ایک اہم سپلائر ہے، جبکہ حالیہ علاقائی صورتحال نے عمان کی اسٹریٹجک اہمیت کو مزید بڑھا دیا ہے۔  مبصرین کا کہنا ہے کہ سیپا معاہدہ بھارت اور عمان کے تعلقات کو محض تجارت تک محدود نہیں رکھے گا بلکہ سرمایہ کاری، خدمات، ڈیجیٹل معیشت، لاجسٹکس اور سپلائی چین تعاون کے نئے مواقع بھی پیدا کرے گا، جس سے دونوں ممالک کے اقتصادی روابط ایک نئے مرحلے میں داخل ہوں گے۔