وزیر اعظم نریندر مودی اگلے ہفتے جنوبی افریقہ اور یونان کا دورہ کریں گے

نئی دلی۔ 18؍ اگست۔ ایم این این۔ وزیر اعظم نریندر مودی 22 سے 24 اگست تک جنوبی افریقہ کے جوہانسبرگ کا دورہ کریں گے ۔ پی ایم مودی جنوبی افریقہ کے صدر ماتمیلا سیرل رامافوسا کی دعوت پر 15ویں برکس چوٹی کانفرنس میں شرکت کریں گے ۔ جنوبی افریقہ کے دورے کے بعد، وہ اپنے یونانی ہم منصب کیریاکوس متسو تاکیس  کی دعوت پر سرکاری دورے پر یونان جائیں گے۔ اپنے جنوبی افریقہ کے دورے کے دوران، وزیر اعظم مودی برکس سمٹ کے بعد منعقد ہونے والے ایک خصوصی پروگرام "برکس – افریقہ آؤٹ ریچ اور برکس پلس ڈائیلاگ” میں بھی شرکت کریں گے، جس میں جنوبی افریقہ کی طرف سے مدعو کردہ دیگر ممالک بھی شامل ہوں گے۔ وزارت خارجہ  نے ایک پریس ریلیز میں اعلان کیا۔  بیان کے مطابق  وہ جوہانسبرگ میں موجود بعض رہنماؤں سے دو طرفہ ملاقاتیں بھی کریں گے۔وزارت خارجہ  نے ایک پریس ریلیز میں کہا، "یہ 2019 کے بعد سے پہلی ذاتی طور پر ہونے والی برکس چوٹی کانفرنس ہوگی۔ سربراہی اجلاس گروپنگ کی طرف سے شروع کیے گئے اقدامات کی پیشرفت کا جائزہ لینے اور مستقبل میں سرگرمیوں کے شعبوں کی نشاندہی کرنے کا موقع فراہم کرے گا۔  جنوبی افریقہ 22 سے 24 اگست تک جوہانسبرگ میں 15ویں برکس سمٹ کی میزبانی کرنے والا ہے۔ اس اتحاد میں پانچ ممالک برازیل، روس، بھارت، چین اور جنوبی افریقہ شامل ہیں۔  جنوبی افریقہ کے اپنے دورے کے بعد، پی ایم مودی 25 اگست کو یونان جائیں گے۔ اپنے دورے کے دوران، وہ اپنے یونانی ہم منصب  کے ساتھ ملاقات کریں گے اور دونوں ممالک کے درمیان تعلقات کو مزید گہرا کرنے کے طریقوں پر تبادلہ خیال کریں گے۔ وہ دونوں ممالک کے کاروباری رہنماؤں سے بھی بات چیت کریں گے۔ وہ یونان میں ہندوستانی برادری کے ساتھ بھی بات چیت کریں گے۔پچھلے 40  برسوںمیں کسی ہندوستانی وزیر اعظم کا یونان کا یہ پہلا دورہ ہو گا۔ہندوستان اور یونان کے درمیان تہذیبی تعلقات ہیں، جو حالیہ برسوں میں بحری نقل و حمل، دفاع، تجارت اور سرمایہ کاری اور عوام سے عوام کے تعلقات جیسے شعبوں میں تعاون کے ذریعے مضبوط ہوئے ہیں۔