ریاست اور مرکزی حکومت کے درمیان بہتر تال میل سے چھتیس گڑھ تیزی سے ترقی کرے گا۔ منوہر لال

رائے پور۔ 10؍ جولائی۔ ایم این این۔ بجلی نیز ہاؤسنگ اور شہری امور کے مرکزی وزیر جناب منوہر لال نے آج رائے پور میں چھتیس گڑھ کے لیے بجلی اور شہری ترقیات کے شعبے میں جاری اسکیموں اور تجاویز کا جائزہ لیا۔اس جائزہ میٹنگ میں چھتیس گڑھ کے وزیر اعلیٰ جناب  وشنو دیو سائی، ہاؤسنگ اور شہری امور کے مرکزی وزیر مملکت جناب توکھن ساہو، نائب وزیر اعلیٰ ارون ساؤ اور چیف سکریٹری جناب امیتابھ جین نے بھی شرکت کی۔مرکزی وزیر جناب منوہر لال نے میٹنگ میں کہا کہ ریاست اور مرکزی حکومت کے درمیان بہتر تال میل سے چھتیس گڑھ تیزی سے ترقی کرے گا۔ مرکزی وزیر نےمزید کہا کہ چھتیس گڑھ کو بجلی اور رہائش سے متعلق تمام ضروریات کو پورا کرنے کے لیے مرکزی حکومت کی مکمل حمایت حاصل ہوگی۔ انہوں نے کہا کہ وزیر اعظم جناب نریندر مودی کی قیادت میں ملک میں کئی اصلاحی اقدامات کئے جا رہے ہیں۔ عوام کی امنگوں کے عین مطابق کام ہو رہا ہے۔انہوں نے ریاستی حکومت سے کہا کہ وہ  مرکزی حکومت کی طرف سے دیے جانے والے تمام فنڈز اور گرانٹس کا بھرپور استعمال کرے۔ یہ رقم  مرکزی حکومت کی طرف سے اتنی ہی تیزی سے جاری کی جائے گی جتنی تیزی سے ریاست میں کام کئے جائیں گے۔ انہوں نے یقین دلایا کہ ریاست میں ترقیاتی اسکیموں کے سلسلے میں مرکزی حکومت کی جانب سے کوئی مشکل پیش نہیں آئے گی۔ مرکزی وزیر جناب منوہر لال نے میٹنگ میں تجویز پیش کی کہ کلین سٹی (صاف ستھرے شہر) کے تحت رائے پور کو موصول ہونے والی 100 بسوں کو بھی نیا رائے پور اور رائے پور کے درمیان چلانے کے لیے استعمال کیا جا سکتا ہے۔انہوں نے ہاؤسنگ اور شہری امور کی وزارت کے  تحت پردھان منتری آواس یوجنا، پی ایم سواندھی، امرت مشن، سوچھ بھارت مشن، پی ایم ای بس سیوا، اسمارٹ سٹی مشن اور قومی شہری ترقی مشن کے کاموں کا جائزہ لیا۔ انہوں نے ان اسکیموں کے لیے مناسب فنڈز فراہم کرنے کا بھی  یقین دلایا۔وزیر اعلیٰ وشنو دیو سائی نے دورے کے لیے مرکزی وزیر جناب منوہر لال کا شکریہ ادا کیا اور مرکزی وزیر سے درخواست کی کہ وہ ریاست پر نظرثانی شدہ توجہ مرکوز کرتے ہوئے ترجیحی بنیادوں پر تقریباً 50 ہزار مکانات کی منظوری دیں، جس کے تحت پردھان منتری آواس یوجنا (شہری) اور وکاس بھارت سنکلپ یاترا میں جمع کردہ درخواستیں منظوری کے لیے زیر التواء ہیں اسی طرح  19,906 مکانات منظوری  کےلئے زیر التوا  ہیں۔ انہوں نے امید ظاہر کی کہ آج کی میٹنگ ریاست میں توانائی اور شہری ترقیات کو ایک نئی تحریک دے گی۔