متحدہ عرب امارات کے صدر عزت مآب شیخ محمد بن زاید النہیان کی ہدایت پر عمل کرتے ہوئے وفاقی ادارہ برائے شناخت، شہریت، کسٹمز اور بندرگاہی تحفظ (ICP) نے متحدہ عرب امارات میں مقیم تمام ایرانی شہریوں – خواہ وہ رہائشی ہوں یا وزیٹر – کے لیے اووراسٹے (قیام کی مدت سے زائد رہائش) پر عائد جرمانوں کی مکمل معافی کا اعلان کیا ہے۔
یہ فیصلہ اقامتی ویزا یا وزٹ ویزا رکھنے والوں دونوں پر لاگو ہوگا، اور ان میں ویزا کی قسم کی کوئی قید نہیں ہو گی۔
وفاقی ادارے نے اپنے بیان میں کہا ہے کہ یہ اقدام خطے میں موجود غیرمعمولی حالات کے پیشِ نظر کیا گیا ہے، جس کا مقصد اُن افراد کی مشکلات کو کم کرنا ہے جو ایران کی فضائی حدود کی بندش اور پروازوں کی معطلی کے باعث وطن واپس نہیں جا سکے۔
وفاقی ادارہ برائے شناخت، شہریت، کسٹمز اور بندرگاہی تحفظ نے انسانی بنیادوں پر اس فیصلے کو اپنی وسیع تر حکمتِ عملی کا حصہ قرار دیا ہے، اور کہا ہے کہ امارات میں مقیم تمام رہائشیوں اور زائرین کو ہر ممکن معاونت فراہم کی جا رہی ہے۔
ادارے نے اہل افراد سے اپیل کی ہے کہ وہ یہ رعایت حاصل کرنے کے لیے ICP اسمارٹ سروسز پلیٹ فارم پر رجسٹریشن کروائیں یا ملک بھر میں موجود کسی بھی کسٹمر ہیپی نیس سینٹر سے رجوع کریں۔