گولڈن ویزا سے متعلق افواہیں بے بنیاد ہیں، یو اے ای کا واضح مؤقف جاری

-وفاقی اتھارٹی برائے شناخت، شہریت، کسٹمز اور پورٹ سیکیورٹی (ICP) نے ان خبروں کو سراسر بے بنیاد قرار دیا ہے جن میں دعویٰ کیا گیا تھا کہ متحدہ عرب امارات بعض مخصوص قومیتوں کو تاحیات گولڈن ویزا جاری کر رہا ہے۔

اتھارٹی نے واضح کیا کہ گولڈن ویزا سے متعلق زمروں، شرائط اور ضوابط کی تفصیل باقاعدہ قوانین، قانون سازی اور وزارتی فیصلوں کی روشنی میں طے کی گئی ہے، اور ان سے متعلق مستند معلومات صرف اتھارٹی کی سرکاری ویب سائٹ یا اسمارٹ ایپلیکیشن پر دستیاب ہیں۔

بیان میں اس بات پر زور دیا گیا کہ گولڈن ویزا کی تمام درخواستیں صرف اور صرف امارات کے اندر موجود سرکاری سرکاری چینلز کے ذریعے ہی قبول کی جاتی ہیں، اور نہ ہی کوئی اندرونی یا بیرونی مشاورتی ادارہ اس عمل میں مجاز حیثیت رکھتا ہے۔

اتھارٹی نے ان رپورٹس پر بھی تشویش کا اظہار کیا جو ایک غیر ملکی کنسلٹنسی آفس کی جانب سے شائع کی گئیں، جن میں یہ دعویٰ کیا گیا کہ بیرونِ ملک سے کسی بھی زمرے کے افراد کو آسان شرائط کے تحت تاحیات گولڈن ویزا دلوانا ممکن ہے۔ اتھارٹی نے ان خبروں کو قانونی جواز سے محروم، گمراہ کن اور متعلقہ حکام سے کسی بھی مشاورت کے بغیر جاری کردہ قرار دیا۔

مزید کہا گیا کہ اتھارٹی شفافیت، سلامتی اور سہولت پر مبنی خدمات کی فراہمی کے لیے پرعزم ہے، اور یہ تمام خدمات صرف سرکاری ڈیجیٹل پلیٹ فارمز کے ذریعے ہی فراہم کی جاتی ہیں۔

اتھارٹی نے سخت مؤقف اپناتے ہوئے کہا کہ جھوٹی معلومات پھیلانے، اور عوام کی اُمیدوں کا ناجائز فائدہ اُٹھا کر رقم بٹورنے والے افراد یا اداروں کے خلاف قانونی کارروائی کی جائے گی۔

بیان کے اختتام پر عوام کو پرزور تنبیہ کی گئی کہ وہ متحدہ عرب امارات میں رہائش یا سرمایہ کاری سے متعلق کسی بھی قسم کی افواہوں پر یقین نہ کریں، اور نہ ہی کسی غیر مجاز ادارے کو فیس یا ذاتی دستاویزات فراہم کریں۔

اتھارٹی نے مشورہ دیا کہ تمام خواہش مند افراد کسی بھی قدم سے قبل اتھارٹی کی ویب سائٹ یا 24 گھنٹے فعال کال سینٹر (600522222) سے رجوع کریں، تاکہ معلومات کی درستگی یقینی بنائی جا سکے۔