نئی دہلی –– اسلامی جمہوریہ ایران کی عدلیہ کے سربراہ حجت الاسلام والمسلمین غلام حسین محسنی اژہ ای نے سنیچر5 ستمبر کو دہلی میں، برکس کے رکن ملکوں کے عدلیہ کے سربراہوں کے اجلاس کی افتتاحی تقریب سے خطاب سے کہا ہے کہ آج ہمیں انصاف کی ہر دور سے زیادہ ضرورت ہے۔ انھوں نے کہا کہ قانون اور قانون کی پابندی، ہر معاشرے کے نظام، عدالت اور پیشرفت کے اہم ترین بنیادی ستونوں میں ہے۔
ایرانی عدلیہ کے سربراہ نے کہا کہ ضرورت اس بات کی ہے کہ انصاف کو انتخابی اور سیاسی محرکات کا تابع نہ بنایا جائے،قانونی کی حکمرانی، سیاسی محرکات پر قربان نہ کی جائے اور اقوام کے حقوق کا تعین، ان کی طاقت کے پیمانے پرنہ کیا جائے۔ حجت الاسلام والمسلمین غلام حسین محسنی اژہ ای نے کہا کہ حکومتوں اور بین الاقوامی اداروں کی جانب سے اصول وضوابط اور قوانین کی پابندی، خود سری، زور زبردستی اور تسلط پسندی کو روک سکتی ہے۔انھوں نے کہا کہ منصفانہ بین الاقوامی نظام اس وقت قائم ہوگا جب، طاقت، دولت وثروت اور اثرورسوخ سے قطع، سبھی ملکوں کو برابر کے حقوق حاصل ہوں ، کسی کے مفاد کو بھی دوسروں کے مفاد پر ترجیح حاصل نہ ہو اور کوئی بھی طاقت دوسروں پر اپنا ارادہ مسلط نہ کرسکے۔