نجی شعبہ اور جدت بنیں گے ترقی کی بنیاد
نئی دہلی۔12؍ ستمبر۔ ایم این این۔ بھارت کا خلائی شعبہ تیزی سے ایک نئے تجارتی اور اختراعی دور میں داخل ہو رہا ہے اور ملک کی خلائی معیشت 2033 تک 4.22 لاکھ کروڑ روپے، یعنی تقریباً 44 ارب ڈالر تک پہنچ سکتی ہے۔ نئی پالیسی اصلاحات، نجی کمپنیوں کی بڑھتی شمولیت، اسٹارٹ اپس اور سیٹلائٹ پر مبنی خدمات کی بڑھتی مانگ اس ترقی کے اہم محرکات قرار دیے گئے ہیں۔ بھارت کی اسپیس پالیسی 2023 نے نجی کمپنیوں کے لیے سیٹلائٹ آپریشن، لانچ سروسز، گراؤنڈ سسٹمز اور ریموٹ سینسنگ سمیت خلائی شعبے کی مکمل ویلیو چین میں کام کرنے کے نئے مواقع پیدا کیے ہیں۔ اس کے ساتھ ان سپیس اور نیو سپیس انڈیا لمیٹڈکے ذریعے نجی سرمایہ کاری، ٹیکنالوجی کی منتقلی اور تجارتی سرگرمیوں کو بھی فروغ دیا جا رہا ہے۔ رپورٹ کے مطابق بھارت کے لیے اگلا بڑا موقع صرف راکٹ اور سیٹلائٹ بنانے تک محدود نہیں بلکہ سیٹلائٹ کمیونیکیشن، ارتھ آبزرویشن، نیویگیشن اور جیو اسپیشل اینالیٹکس جیسے شعبوں میں موجود ہے۔ یہ ٹیکنالوجیز زراعت، لاجسٹکس، بنیادی ڈھانچے کی منصوبہ بندی، قدرتی آفات سے نمٹنے، موسمیاتی تحفظ اور سرکاری خدمات کو زیادہ مؤثر بنانے میں اہم کردار ادا کر سکتی ہیں۔ سیٹلائٹ کمیونیکیشن بھارت کے دور دراز اور دیہی علاقوں میں تیز رفتار انٹرنیٹ اور ڈیجیٹل خدمات پہنچانے میں بھی مدد دے سکتی ہے، جبکہ بھارت کا مقامی نیویگیشن نظام NavIC غیر ملکی نیویگیشن سسٹمز پر انحصار کم کرکے ملک کی تکنیکی خود مختاری کو مزید مضبوط کر سکتا ہے۔ خلائی شعبہ بھارت کی قومی سلامتی کے لیے بھی تیزی سے اہم ہوتا جا رہا ہے۔ محفوظ مواصلات، سرحدی نگرانی، میری ٹائم ڈومین آگاہی، نیویگیشن اور خلائی نگرانی جیسی صلاحیتیں دفاعی تیاری اور اسٹریٹجک خود مختاری کو مضبوط کرنے میں مدد دے رہی ہیں۔ رپورٹ میں کہا گیا ہے کہ 44 ارب ڈالر کی خلائی معیشت کا ہدف حاصل کرنے کے لیے بھارت کو مینوفیکچرنگ میں وسعت، نجی سرمایہ کاری کے لیے بہتر ماحول، مضبوط ریگولیٹری نظام، سرکاری طلب کے ذریعے نئی ٹیکنالوجی کی حوصلہ افزائی اور دفاعی خلائی صلاحیتوں میں سرمایہ کاری بڑھانا ہوگی۔ ساتھ ہی بھارت کے پاس خود کو عالمی خلائی صنعت کے ایک اہم مینوفیکچرنگ اور ایکسپورٹ ہب کے طور پر قائم کرنے کا بھی بڑا موقع موجود ہے۔
بھارت کی خلائی معیشت 2033 تک 44 ارب ڈالر تک پہنچنے کی راہ پر
