نئی دہلی، 23 ستمبر 2026: بھارت میں عوامی جمہوریہ چین کے سفارتخانے کی جانب سے نئی دہلی میں عوامی جمہوریہ چین کے قیام کی 77ویں سالگرہ کے موقع پر ایک پروقار استقبالیہ کا اہتمام کیا گیا۔
تقریب کے مہمانِ خصوصی بھارت کے کامرس سیکریٹری عالی جناب راجیش اگروال تھے۔ اس موقع پر بھارتی حکومت، سیاسی جماعتوں، کاروباری و صنعتی حلقوں، تھنک ٹینکس، ذرائع ابلاغ، سفارتی برادری کے نمائندگان کے علاوہ بھارت میں مقیم چینی باشندوں، چینی کمپنیوں اور چینی طلبہ سمیت 500 سے زائد معزز مہمانوں نے شرکت کی۔تقریب سے خطاب کرتے ہوئے عالی جناب شو فی ہونگ، سفیر عوامی جمہوریہ چین برائے بھارت نے گزشتہ 77 برسوں کے دوران چین کی ترقی اور کامیابیوں پر روشنی ڈالی۔ انہوں نے کہا کہ کمیونسٹ پارٹی آف چائنا نے چینی عوام کو متحد کرتے ہوئے مسلسل جدوجہد کی ہے اور چین نے جدیدیت کی جانب اپنا منفرد راستہ کامیابی سے طے کیا ہے۔ اس عمل نے چینی قوم کی عظیم نشاۃِ ثانیہ کی مضبوط بنیاد فراہم کی ہے اور عالمی امن و ترقی میں بھی اہم کردار ادا کیا ہے۔
چینی سفیر نے کہا کہ چین اور بھارت قریبی ہمسایہ ممالک ہیں اور دونوں ملکوں کے درمیان دوستانہ روابط اور تعاون ہمیشہ دوطرفہ تعلقات کا اہم حصہ رہے ہیں۔ انہوں نے حالیہ دنوں میں چینی صدر شی جن پنگ کے بھارت کے دورے اور برکس سربراہی اجلاس میں شرکت کے موقع پر بھارتی وزیر اعظم نریندر مودی کے ساتھ ہونے والی ملاقات کا بھی ذکر کیا۔
سفیر شو فی ہونگ نے کہا کہ دونوں رہنماؤں نے چین۔بھارت تعلقات کو صحت مند اور مستحکم راستے پر آگے بڑھانے کے حوالے سے اہم اتفاقِ رائے حاصل کیا ہے۔ انہوں نے کہا کہ چین بھارت کے ساتھ مل کر اچھے ہمسایہ اور دوستانہ تعلقات کو فروغ دینے، باہمی کامیابیوں کے حصول، پرامن بقائے باہمی کی مثال قائم کرنے اور کثیرالجہتی تعاون کو مضبوط بنانے کے لیے مشترکہ کوششیں جاری رکھے گا، تاکہ چین۔بھارت تعلقات کو نئی بلندیوں تک پہنچایا جا سکے۔اس موقع پر بھارت کے کامرس سیکریٹری راجیش اگروال نے بھارتی حکومت اور عوام کی جانب سے عوامی جمہوریہ چین کے قیام کی 77ویں سالگرہ پر چینی حکومت اور عوام کو دلی مبارکباد اور نیک خواہشات پیش کیں۔
انہوں نے کہا کہ صدر شی جن پنگ کا حالیہ برکس سربراہی اجلاس میں شرکت کے لیے بھارت کا دورہ اور وزیر اعظم نریندر مودی کے ساتھ ان کی ملاقات نے بھارت۔چین تعلقات میں مثبت پیش رفت کے لیے نئی توانائی فراہم کی ہے۔ انہوں نے کہا کہ بھارت چین کے ساتھ بات چیت کا سلسلہ برقرار رکھنے، تعاون کو مضبوط بنانے اور اختلافات کو مناسب طریقے سے حل کرنے کے لیے تیار ہے۔
راجیش اگروال نے اس اعتماد کا اظہار کیا کہ بھارت اور چین ایک ایسا مستحکم، قابلِ پیش گوئی اور باہمی مفاد پر مبنی اقتصادی و تجارتی تعلق قائم کر سکتے ہیں، جو دونوں ممالک کے لیے سودمند ہو۔
تقریب کے دوران مختلف شاندار ثقافتی پروگرام بھی پیش کیے گئے، جنہیں شرکاء نے بھرپور سراہا۔ تقریب کا ماحول گرمجوشی، دوستی اور باہمی احترام سے بھرپور رہا، جس نے بھارت اور چین کے درمیان مسلسل مکالمے، عوامی روابط اور تعاون کی اہمیت کو اجاگر کیا۔