جموں اور کشمیر کے سابق وزیر اعلی فاروق عبداللہ پہنچے اجمیر

نیشنل کانفرنس کے لیڈر اور جموں و کشمیر کے سابق وزیر اعلی فاروق عبداللہ ایک روزہ دورے پر اجمیر پہنچے ۔  اس دوران فاروق عبداللہ نے اجمیر میں میڈیا سے بات کرتے ہوئے مرکزی حکومت پر شدید حملہ کیا۔  فاروق عبداللہ نے کہا کہ اگر حکومت کہتی ہے کہ جموں و کشمیر میں حالات بہتر ہیں تو وہاں انتخابات کیوں نہیں کرائے جا رہے ہیں۔  ساتھ ہی فاروق عبداللہ نے ملک کی جانب سے ترکی بھیجی گئی مدد کی بھی تعریف کی۔  انہوں نے کہا کہ ہندوستان سے بھیجی گئی امداد نے ہزاروں جانیں بچائی ہیں۔  ہندوستان ہمیشہ دوسرے ممالک کے لئے مددگار رہا ہے۔
جموں و کشمیر کے سابق وزیر اعلیٰ فاروق عبداللہ نے بھی اجمیر میں خواجہ غریب نواز کی درگاہ پر حاضری دی۔ انہوں نے سرکٹ ہاؤس میں میڈیا سے بات چیت کی اور جموں و کشمیر کی صورتحال کے بارے میں معلومات دینے کے ساتھ ساتھ ہندوستان اور پاکستان کے تعلقات اور انتخابات کے بارے میں کھل کر بات کی۔انہوں نے کہا کہ جموں و کشمیر کے حالات کسی سے پوشیدہ نہیں ہیں ۔ اگر وہاں کے حالات ٹھیک تھے تو مرکزی حکومت وہاں الیکشن کیوں نہیں کروا رہی۔  اس کے ساتھ انہوں نے یہ بھی کہا کہ کشمیری پنڈت ایک عرصے سے جموں و کشمیر میں واپس آنے کی بات کر رہے ہیں، لیکن وہ اب بھی جموں میں آباد ہیں اور وہیں اپنی تنخواہوں کے لئے لڑ رہے ہیں۔