دہلی اسٹیٹ حج کمیٹی کی جانب سے گزشتہ یکم مئی سے شروع 9 روزہ حج تربیتی پروگرام کے دوسرے دن آج جنوبی دہلی علاقہ کے تقریباً 200 عازمین کو حج سے متعلق امور اور ارکان و مسائل کے علاوہ دوران حج مدینہ منورہ و مکہ مکرمہ میں عازمین حج کو درپیش مشکلات اور معاملات پر تربیت دی گئی۔اس موقع پر آج کے تربیتی اجلاس میں دہلی سے حج بیت اللہ کے لیے روانہ ہونے والی 40 بغیر محرم خواتین کو بھی خصوصی طور پر ایک ساتھ مدعو کیا گیا۔
دہلی اسٹیٹ حج کمیٹی کی چیئرپرسن کوثر جہاں، ممبر و کونسلر نازیہ دانش، ایگزیکٹو آفیسر اشفاق احمد عارفی، ڈپٹی ایگزیکٹو آفیسر محسن علی، ڈسٹرکٹ ٹرینر خلیق احمد، مفتی شمیم احمد قاسمی اور خاتون عالمہ صبیحہ صالحاتی صاحبہ نے عازمین حج سے خطاب کیا۔آج کے تربیتی اجلاس میں دہلی اسٹیٹ حج کمیٹی کی چیئرپرسن کوثر جہاں بغیر محرم حج پر جانے والی خواتین سے خصوصی طور پر روبرو ہوئیں۔ انہیں مبارکباد پیش کرتے ہوئے صحت و سلامتی کے ساتھ فریضہ حج کی ادائیگی کے بعد وطن واپسی کے لیے نیک تمناؤں کا اظہار کیا۔ انہوں نے ان خواتین عازمین حج کو یقین دہانی کرائی کہ وہ اپنی جانب سے ہر ممکن کوشش کریں گی کہ انہیں دوران حج کسی طرح کی دقت و پریشانی کا سامنا نہ کرنا پڑے۔