سیکرٹری خارجہ کواترا نے تہران میں ایرانی وزیر خارجہ سے ملاقات کی

تہران( ایران)۔ 26؍ نومبر۔ ایم این این۔ خارجہ سکریٹری ونے کواترا نے اتوار کو تہران میں ایرانی وزیر خارجہ حسین امیر عبداللہیان سے ملاقات کی اور دو طرفہ تعلقات کو مضبوط بنانے، چابہار بندرگاہ کے ذریعے رابطوں کو فروغ دینے اور حماس اسرائیل تنازعہ سے پیدا ہونے والی مغربی ایشیا کی موجودہ صورتحال پر تبادلہ خیال کیا۔وزارت خارجہ کے ترجمان ارندم باغچی نے کہا کہ دونوں فریقوں نے مختلف شعبوں میں جاری تعاون کو مزید مضبوط بنانے پر اتفاق کیا۔باغچی نے ایکس پر کہا، ”خارجہ سکریٹری ونے کواترا نے آج تہران میں ایران کے  وزیر خارجہ امیرعبداللہیان سے ملاقات کی۔انہوں نے دو طرفہ امور، چابہار بندرگاہ سمیت رابطوں کے منصوبوں اور خطے میں موجودہ چیلنجز پر مشترکہ نقطہ نظر پر تبادلہ خیال کیا۔ دونوں فریقوں نے مختلف شعبوں میں جاری تعاون کو مزید مضبوط بنانے پر اتفاق کیا۔کواترا کا دورہ تہران اہمیت کا حامل ہے کیونکہ یہ حماس اور اسرائیل کے درمیان دشمنی پر بڑھتے ہوئے عالمی خدشات کے درمیان آیا ہے۔ دونوں فریقین نے جمعہ سے چار روزہ جنگ بندی پر اتفاق کیا۔تہران میں کواترا نے ایران کے نائب وزیر خارجہ برائے اقتصادی سفارت کاری مہدی سفاری سے بھی ملاقات کی۔باغچی نے کہا کہ بات چیت میں چابہار بندرگاہ کو ایک کنیکٹیویٹی پروجیکٹ کے طور پر ترقی دینے میں ہندوستان کی مصروفیت کو ٹھوس بنانے پر توجہ دی گئی۔ انہوں نے کہا کہ ”وسیع تر تجارت اور سرمایہ کاری کے تعلقات کو بڑھانے کے طریقوں کا بھی جائزہ لیا گیا’ ‘۔توانائی سے مالا مال ایران کے جنوبی ساحل پر صوبہ سیستان بلوچستان میں واقع چابہار بندرگاہ کو ہندوستان اور ایران کنیکٹیویٹی اور تجارتی تعلقات کو فروغ دینے کے لیے تیار کر رہے ہیں۔2021 میں تاشقند میں ایک کنیکٹیویٹی کانفرنس میں، وزیر خارجہ ایس جے شنکر نے چابہار بندرگاہ کو افغانستان سمیت ایک اہم علاقائی ٹرانزٹ مرکز کے طور پر پیش کیا۔