کینیڈا نے آزاد تجارتی معاہدے پر بات چیت روک دی۔ پیوش گوئل

نئی دلی۔5؍ نومبر۔ ایم این این۔مرکزی وزیر تجارت و صنعت  جناب  پیوش گوئل نے کہا کہ آزاد تجارتی معاہدے کے لیے ہندوستان اور کینیڈا کے درمیان بات چیت رکی ہوئی ہے کیونکہ بعد میں کچھ غلط فہمیوں کی وجہ سے بات چیت روک دی گئی۔ جناب گوئل نے ہفتہ کو ہندوستان ٹائمز لیڈر شپ سمٹ میں کہا، "کچھ کینیڈین سیاست دانوں میں کچھ غلط فہمیاں ہیں، جو بے بنیاد ہیں۔” جناب گوئل نے کہا کہ اس اقدام سے کینیڈا کو زیادہ نقصان پہنچے گا کیونکہ ہندوستان کی مارکیٹ بڑی ہے اور زیادہ مواقع فراہم کرتی ہے۔ انہوں نے مزید کہا کہ معاہدے کے بارے میں برطانیہ کے ساتھ بات چیت بتدریج آگے بڑھ رہی ہے۔کینیڈا اور ہندوستان کے تعلقات اس وقت سے خراب ہوئے جب وزیر اعظم جسٹن ٹروڈو نے نئی دہلی پر برٹش کولمبیا میں خالصتانی دہشت گرد کے قتل کی منصوبہ بندی کا الزام لگایا، اس دعوے کی ہندوستان نے واضح طور پر تردید کی ہے۔دونوں ممالک کے درمیان تجارت 2022-23 میں 8.16 بلین ڈالر رہی، جو کہ امریکہ کے ساتھ ہندوستان کی باہمی تجارت کے 128.7 بلین ڈالر کے مقابلے میں کم ہے۔ تاہم، ہندوستان اپنی پوٹاش کی ضروریات کے لیے تقریباً مکمل طور پر درآمدات پر منحصر ہے، اور دنیا کے سب سے بڑے برآمد کنندہ، کینیڈا سے فصل کے غذائی اجزاء کی ایک بڑی مقدار خریدتا ہے۔