الیکشن کمیشن کی ووٹروں سے پولنگ اسٹیشن پہنچ کر ووٹ ڈالنے کی اپیل

نئی دہلی، 20 مئی (ہ س) عام انتخابات کے پانچویں مرحلے میں آج صبح آٹھ ریاستوں اور مرکز کے زیر انتظام علاقوں کی 49 نشستوں پر ووٹنگ شروع ہو گئی۔ اس مرحلے میں اتر پردیش کی 14، مہاراشٹر کی 13، مغربی بنگال کی سات، اڈیشہ کی پانچ، بہار کی پانچ، جھارکھنڈ کی تین، جموں و کشمیر کی ایک، لداخ کی ایک نشستیں شامل ہیں۔ جیسے ہی ووٹنگ کا یہ مرحلہ مکمل ہوگا، راجناتھ سنگھ، اسمرتی ایرانی، راہول گاندھی، چراغ پاسوان، راجیو پرتاپ روڈی، روہنی آچاریہ، عمر عبداللہ اور پیوش گوئل جیسے بڑے لیڈروں کا مستقبل ای وی ایم میں بند ہو جائے گا۔ پانچویں مرحلے کے ساتھ کل 428 سیٹوں پر انتخابات مکمل ہوں گے۔

پانچویں مرحلے میں کل 695 امیدوار میدان میں ہیں۔ ان میں 82 خواتین بھی شامل ہیں۔ یعنی 12 فیصد خواتین بھی سیاسی بساط پر قسمت آزمائی کر رہی ہیں۔ بہار کے مظفر پور ضلع کے ایک پولنگ بوتھ پر ووٹنگ شروع ہونے سے پہلے ہی خواتین ووٹرز کی ایک بڑی تعداد کو قطار میں کھڑے دیکھا گیا۔ صنعتکار انیل امبانی کو ممبئی کے ایک پولنگ بوتھ پر قطار میں دیکھا گیا۔
الیکشن کمیشن آف انڈیا کے مطابق آج اوڈیشہ اسمبلی کی 35 اسمبلی سیٹوں کے لیے بھی ایک ساتھ ووٹنگ ہو رہی ہے۔ کمیشن نے ووٹروں سے بڑی تعداد میں پولنگ سٹیشنوں پر پہنچنے اور ذمہ داری اور فخر کے ساتھ ووٹ ڈالنے کی اپیل کی ہے۔ عام انتخابات میں اب تک تمام پولنگ سٹیشنوں پر تقریباً 66.95 فیصد ووٹنگ ہو چکی ہے۔ پہلے چار مرحلوں میں تقریباً 45 کروڑ 10 لاکھ لوگوں نے ووٹ ڈالے ہیں۔ باقی تین مرحلوں کے لیے ووٹنگ یکم جون تک جاری رہے گی۔ ووٹوں کی گنتی 4 جون کو ہوگی۔ عام انتخابات کے پہلے چار مرحلوں میں 23 ریاستوں /مرکز کے زیر انتظام علاقوں اور 379 لوک سبھا پارلیمانی حلقوں کے لیے ووٹنگ آسانی سے اور پرامن طریقے سے ہوئی۔