کچھ ممالک میں پولیس کے معاملے لگاتار بڑھ رہے ہیں جس پر حکومت ہند گہری نظر رکھ رہی ہے۔ موجودہ حالات کو پیش نظر رکھتے ہوئے مرکزی حکومت نے پولیو ماثرہ 11 ممالک کے سفر سے قبل ٹیکہ کاری کو لازمی قرار دے دیا ہے۔ بغیر ٹیکہ کاری کے پولیو متاثرہ ممالک سے آنے والے مسافروں کو بھی ہندوستان میں داخل ہونے سے روکا جا رہا ہے۔ میڈیا رپورٹس کے مطابق مرکزی وزارت نے پرانے اصولوں میں ترمیم کرتے ہوئے مسافروں کے لیے اورل پولیو ویکسین (او پی وی) کے علاوہ اِنیکٹیویٹیڈ پولیو ویکسین (آئی پی وی) کو بھی منظوری دی ہے۔ یہ خوراک سفر سے کم از کم 4 ہفتہ قبل لینا لازمی ہے۔ دونوں میں سے کسی بھی ایک ٹیکہ کی خوراک کا سرٹیفکیٹ سفر کے لیے قابل قبول ہوگا۔
بتایا جا رہا ہے کہ مرکزی حکومت نے افغانستان، کیمرون، نائیجیریا، پاکستان، صومالیہ اور شام کو اینڈیمک ممالک (جہاں مقامی سطح پر پولیو پھیلا ہے) کے زمرہ میں رکھا ہے۔ دوسری طرف ملاوی، موزامبق، میڈاغاسکر، کانگو اور ڈی آر کانگو کو پولیو وائرس پھیلاؤ کے زمرہ میں رکھا گیا ہے۔ حکومت نے گزشتہ یکم مئی سے ان ممالک سے مسافروں کی آمد و رفت پر نگرانی شروع کر دی ہے۔ سنٹرل ڈائریکٹوریٹ آف ہیلتھ کی اسسٹنٹ ڈائریکٹر جنرل ڈاکٹر شکھا وردھن نے جاری ایک خط میں کہا ہے کہ ہندوستانیوں یا پھر بیرون ممالک کے شہریوں کے لیے عمر اور ٹیکہ کاری کی حالت سے متعلق پروا کیے بغیر روانگی سے پہلے ایک خوراک لینا لازمی ہے۔ انھوں نے مزید کہا کہ آئندہ وقت میں انفیکشن متاثرہ ممالک کی فہرست میں ترمیم بھی کی جا سکتی ہے۔