شیخ عبداللہ بن زاید النہیان نے ہنوئی کے دورے کے دوران ویتنام کے وزیر خارجہ بوئی تھان سن سے ملاقات کی۔فریقین نے دوطرفہ تعلقات کو فروغ دینے اور تمام شعبوں بالخصوص اقتصادی شعبوں میں مشترکہ تعاون کے طریقوں پر تبادلہ خیال کیا۔ انہوں نے متحدہ عرب امارات اور جنوب مشرقی ایشیائی ممالک کی تنظیم (آسیان) کے مابین مشترکہ تعاون کے علاوہ جامع اقتصادی شراکت داری کے معاہدے تک پہنچنے کے لئے دونوں ممالک کی کوششوں کا بھی جائزہ لیا۔ شیخ عبداللہ بن زاید نے ویتنام کے وزیر خارجہ کو اس سال نومبر میں ایکسپو سٹی دبئی میں اقوام متحدہ کی موسمیاتی تبدیلی کانفرنس آف دی پارٹیز (کوپ 28) کی میزبانی کے لئے متحدہ عرب امارات کی تیاریوں کے بارے میں آگاہ کیا۔
انہوں نے موسمیاتی تبدیلی سے نمٹنے کے لئے موثر حل اپنانے اور عالمی کوششوں کو متحرک کرنے میں کوپ28 کی اہمیت پر بھی زور دیا۔شیخ عبداللہ نے متحدہ عرب امارات اور ویتنام کے درمیان ممتاز تعلقات پر روشنی ڈالتے ہوئے ایک جامع اقتصادی شراکت داری معاہدے تک پہنچنے کے لئے دونوں ممالک کی کوششوں کا ذکر کیا جو ترقی اور پائیدار اقتصادی خوشحالی کے حصول کے ان کے وژن کی حمایت کرتا ہے۔وزیر بوئی تھان سون نے شیخ عبداللہ بن زید اور ان کے ہمراہ آنے والے وفد کے دورے کا خیر مقدم کرتے ہوئے متحدہ عرب امارات اور ویتنام کے تعلقات کی گہرائی اور تمام شعبوں میں متحدہ عرب امارات کے ساتھ مشترکہ تعاون بڑھانے کی ان کے ملک کی خواہشات پر زور دیا۔ملاقات کے بعد اعلیٰ حکام نے انور قرقاش ڈپلومیٹک اکیڈمی اور ویتنام کی ڈپلومیٹک اکیڈمی کے درمیان مفاہمت کی یادداشت پر دستخط کیے۔ مفاہمتی یادداشت پر ویتنام میں متحدہ عرب امارات کے سفیر ڈاکٹر بدر عبداللہ المتروشی اور ویتنام کی ڈپلومیٹک اکیڈمی کے قائم مقام صدر ڈاکٹر فام لان ڈونگ نے دستخط کیے۔اجلاس میں معاون وزیر برائے اقتصادی و تجارتی امور سعید مبارک الحجری، معاون وزیر خارجہ برائے جدید سائنس و ٹیکنالوجی عمران شرف، معاون وزیر خارجہ برائے صحت ماہ برکات اور سفیر المتروشی نے شرکت کی۔